Ik bin geboren op Drijkeunegen 1946 ien Ureterp. Dat ligt ien Vraislaand en tot mien zesde joar heb k din allinneg ook Vrais proat. Nederlands heurde ik ien kerk en op schoul.

Dou k sikkom tien joar was vervoarden mien ollu noar t Knoal. Thoes bleef t Vrais, op schoul Nederlands mor op stroat leerde ik t Grunnegers. Mien eerste woorden waren: ‘pak op pens hebben’ en ‘piethoane.’ Ik wol nait aans wezen as n aander en leerde t aal speulend. Op mien zestiende vervoarden wie noar Stad en dou was t doan mit t Grunnegers.  Ik kreeg verkeren mit Harmy en dij prout thoes mit heur ollu Grunnegers. Ik dee nait mit mor t kwam mie aal bekend veur. Wie traauwden en ik was onderwiezer op t Knoal van 1971-1974 en dou noar Nijbert as hoofd van n twijmansschoul. Ien 1978 hoofd van de chr. legere schoul ien Middelsom. Doar begunde ik ien 1980 mit Grunneger lezzen op schoul. Hail verzichteg en hail gericht.

As Vrais ging mie t aan t haart dat Grunnegers heur toal noar de bliksem goan laiten deur t heur kiender nait meer te leren. Doardeur kwam ik ien 1984 ien waarkploug van Grunneger leespakketten veur grondschoulen. En van t ain kwam t aander. Te veul om op te nuimen. Ien 1988 kreeg ik veur mien verdainsten van stichten t Grunneger bouk ‘K. ter Loanpries.’ Sunt 1991 bin ik nait meer aan n schoul verbonden en dou nou van ales en nog wat. Dat is mien Grunnger proatje op wonsdagmörn, mien wekelks stukje ien t Dagblad vant Noorden. Joarliekse Grunneger spreukenklender, achtergrond waark veur rtv Noord en nog wat boukjederij. En nô ook op dizze webstek. Van mien kaant zel ik geregeld wat schrieven mor ik verwacht ook reaksies van joe. Dat geft n schiere wizzelwaarken.
Veel plezaaier der mit!